OA.is    

Verkfæri batans 

Við sem stundum tólf spora kerfi OA til bata frá hömlulausu ofáti, höfum komist að því að okkur standa mörg verkfæri til boða til að létta okkur verkið. Við notum þessi verkfæri - mataráætlun, trúnaðarmannakerfi, fundi, síma, skrif, lesefni, nafnleynd og þjónustu - reglulega, til að hjálpa okkur að komast í fráhald og að viðhalda því.
Í Overeaters Anonymous (OA) skilgreinum við fráhald sem þá "framkvæmd að halda sig frá hömululausi áti". Mörg okkar hafa uppgötvað að við getum ekki haldið okkur frá hömlulausu áti nema með því að nota sum eða jafnvel öll átta verkfæri batans.

Mataráætlun
Sem verkfæri hjálpar mataráætlunin til við að halda okkur frá hömlulausi áti. Okkar eigin persónulega mataráætlun er bæði leiðbeinandi fyrir allar okkar ákvarðanir um mataræði og jafnframt leiðarvísir um hvað, hvenær, hvernig, hvar og hvers vegna við borðum. Reynsla okkar er sú að það er mikilvægt að ræða um mataráætlunina við trúnaðarmann eða annan OA félaga.
Engar reglur gilda um það hvernig mataráætlun á að vera. OA hvorki styður, né mælir með mataráætlun, en hver getur gert þær fyrir sig. (Sjá bæklingana Dignity of Choice og A Plan of Eating til frekari upplýsinga). OA mælir með því að þeir sem þurfa ráðgjöf varðandi mataræði eða næringu, leiti til fagfólks svo sem lækna eða næringarfræðinga. Hvert okkar þróar sína eigin mataráætlun sem byggist á heiðarlegu mati á eigin reynslu. Við lærum að þekkja hvers við þörfnumst og hvað við þurfum að forðast.
Þó að einstaklingsbundnar mataráætlanir séu jafn ólíkar og við sjálf þá ber flestum OA félögum saman um það að einhver áætlun - hvort sem hún er almenn eða nákvæm - er nauðsynleg.
Þetta verkfæri hjálpar okkur að takast á við líkamlegan þátt sjúkdómsins og að ná líkamlegum bata. Með það að leiðarljósi náum við meiri árangri í að fylgja tólf spora kerfi OA til bata. Við losnum við matarþráhyggju og öðlumst hamingjusamt, heilbrigt líf og andlega lífsfyllingu.

Trúnaðarmannakerfi
Trúnaðarmenn eru OA félagar sem lifa, eins og þeim frekast er unnt, eftir reyslusporunum og erfðavenjunum tólf. Þeir eru fúsir til þess að miðla reynslu sinni til annarra OA félaga og hafa skuldbundið sig til fráhalds.
Við biðjum trúnaðarmann um að hjálpa okkur í gegnum bataferilinn á öllum þremur sviðum; líkamlega, tilfinningalega og andlega. Þegar trúnaðarmenn vinna með öðrum OA félögum og deila með þeim reynslu, styrk og vonum, endurnýja og styrkja þeir í sífellu sinn eigin bata. Trúnaðarmenn geta aðeins miðlað af sinni persónulegu reynslu.
Kerfið okkar byggist á aðlöðun. Veldu þér trúnaðarmann sem hefur öðlast það sem þú þráir og spurðu þá manneskju að því hvernig hún fer að. OA félagi má vinna með mörgum trúnaðarmönnum samtímis og getur skipt um trúnaðarmann að vild.

Fundir
Fundir eru samkomur þar sem tvær eða fleiri hömlulausar ofætur koma saman og deila hver með annarri persónulegri reynslu ásamt þeim styrk og vonum sem þær hafa öðlast í OA. Þótt til séu margskonar fundir þá byggja þeir allir á sama grunni, félagsskap við aðrar hömlulausar ofætur. Fundir gefa okkur tækifæri til að greina og fá staðfestingu á sameiginlegu vandamáli og þar deilum við með öðrum þeim gjöfum sem OA kerfið hefur fært okkur.

Síminn
Síminn hjálpar okkur við að deila reynslu og styðja hvert annað á persónulegan hátt og koma í veg fyrir þá einangrun sem er svo algeng meðal okkar. Mörg okkar hringja í aðra OA félaga og trúnaðarmanninn daglega. Það að nota símann sem verkfæri til að biðja um hjálp og hjálpa öðrum, er hluti af því ferli að gefast upp og tengjast öðru fólki. Síminn hefur einnig þann kost að hann er yfirleitt ekki langt undan og því tiltækur á erfiðum stundum, þegar við erum að takast á við erfiðar sveiflur, hvort heldur er upp eða niður.

Skrif
Auk þess að gera skrifleg reikningsskil í lífi okkar og gera lista yfir fólk sem við höfum skaðað, þá hafa flest okkar komist að því að skrif hafa verið ómissandi verkfæri í sporavinnunni. Með því að koma hugsunum okkar og tilfinningum á blað eða skrá óþægileg atvik sjáum við gerðir okkar og viðbrögð á annan hátt en þegar við hugsum um eða segjum frá þeim. Áður voru það algengustu viðbrögð okkar við lífinu að leita í hömlulaust át. Þegar við færum erfiðleikana í letur reynist okkur auðveldara að sjá aðstæður skýrar og þá gengur okkur ef til vill betur að meta hvernig við þurfum að bregðast við.

Lesefni
Við lesum og lærum af viðurkenndum OA bæklingum og OA bókum á borð við Overeaters Anonymous, The Twelve Steps and Twelve Traditions of Overeaters Anonymous og For Today. Við lesum líka Lifeline, mánaðarrit okkar um bata. Einnig notum við AA-bókina (Alcoholics Anonymous ), til að skilja og styrkja enn frekar kerfi okkar til bata. Margir OA félagar hafa fundið að daglegur lestur þessa efnis auðveldar okkur að lifa í sporunum tólf. OA lesefnið okkar og AA bókin eru verkfæri sem eru alltaf til staðar. Það gefur okkur innsæi í matarfíknina, styrk til að takast á við hana og von um að til sé lausn.

Nafnleynd
Nafnleyndin, sem fjallað er um í elleftu og tólftu erfðavenjunum, er verkfæri sem tryggir að við setjum málefni og markmið ofar eigin hag. Nafnleyndin veitir okkur tjáningarfrelsi og verndar okkur gegn slúðri. Nafnleyndin tryggir að engum, nema okkur sjálfum, leyfist að segja frá því að við séum félagar í OA. Nafnleynd á vettvangi fjölmiðla þýðir að við látum aldrei birta myndir af okkur þar sem andlit sjást og komum ekki fram undir fullu nafni þegar við kynnum okkur sem félaga í OA. Þetta verndar bæði einstaklinginn og samtökin í heild.
Innan OA samtakanna þýðir nafnleyndin það að allt sem við segjum við aðra OA félaga er trúnaðarmál. Því sem við heyrum á fundum höldum við fyrir okkur. Það verður þó að vera ljóst að nafnleynd má ekki verða til þess að hindra samstarf okkar innan samtakanna. Það er ekki nafnleyndarbrot að gefa upp fullt nafn innan OA deildarinnar eða gagnvart þjónustueiningum samtakanna. Það er heldur ekki brot á nafnleynd að skrifa nöfn OA félaga, sem það vilja, á tólfta spors lista til að afhenda félögum sem þurfa á hjálp að halda. Þó verður að gæta þess að engar persónulegar upplýsingar séu á listanum.
Annað sjónarhorn á nafnleyndina er að við erum öll jafningjar í samtökunum hvort sem við erum nýliðar eða höfum verið lengi í OA. Þjóðfélagsstaða okkar skiptir engu máli í OA, innan okkar raða er enginn öðrum merkilegri. Við hittumst einfaldlega vegna þess að við erum hömlulausar ofætur.

Þjónusta
Megintilgangur OA er að flytja ofætum, sem enn þjást, boðskap samtakanna, enda er það grundvallaratriði í allri þjónustu. Öll þjónusta, hversu lítil sem hún er, sem miðar að því að ná til einhvers sem þjáist af matarfíkn, stuðlar að bata okkar sjálfra. Að fara á fundi, raða stólum, dreifa lesefni, tala við nýliða, gera það sem nauðsynlegt er svo að OA deildin, eða OA sem heild, fái þrifist; allt eru þetta leiðir til að endurgjalda það sem okkur hefur svo örlátlega verið gefið. Við erum hvött til að gera það sem við getum þegar við getum. Okkur er lofað að árangur sporavinnunnar sé: "Heilbrigt, hamingjusamt og árangursríkt líf." Þjónusta stuðlar að því að þetta loforð rætist. Við í OA segjum: "Mín ábyrgð felst í því að rétta út hjálparhönd, í anda OA samtakanna, til allra sem eiga við sömu áráttu að stríða og ég".